Наталья Гребенкина 21 жыл қауіпсіздік күзетінде қызмет етуде, деп хабарлайды  @Pavlodarnews.kz тілшісі. 

Жедел құтқару жасағының бас құтқарушысы – отбасылық өмірін қатар алып жүрген және адамдарды төтенше жағдайлардан қорғайтын маман. Ол еңбек жолын 1996 жылы Павлодар химия зауытының ТЖ бөлімінде инженер болып бастаған. Дәл сол жерде ол ТЖ және зауыт президентінің көмекшісімен бірге альпинизмге дайындық жаттығуларына бастамашы болып, бұл жұмысқа газдан құтқару қызметінің мамандарын тартқан. Кейінірек қаланың және зауыттың әртүрлі нысандарын демеркуризациялауға бірнеше рет қатысқан.

2000 жылы Павлодарда құтқару қызметі ұйымдастырылып, құрамына химия зауыты газдан құтқару қызметінің мамандары кірді. Үш жылдан кейін Наталья Гребенкина бастықтың орынбасары қызметін атқарды, 2005 жылы жедел құтқару жасағы болып қайта құрылғаннан кейін кезекші диспетчерлік қызметті басқарды.

– Бұрын апаттық-құтқару және іздестіру-құтқару жұмыстарына көп қатысуға тура келетін. Біздің жұмысымыздағы ең қиыны – төтенше жағдай кезіндегі зардап шеккен балалармен жұмыс,  – деп атап өтті ол.

Наталья Гребенкина қиын жұмыс күндеріне қарамастан, қызметті отбасылық өмірмен алып жүреді. 

– Мен азаматтық қорғау органдарында жұмыс істей бастағанда  қызым 15 жаста еді, сондықтан мансап пен отбасын біріктіру оңай болды, – дейді ол.

Оның айтуынша, құтқару қызметіндегі әйелдер физикалық сынақтарды ғана емес, психологиялық қиындықтарды да жеңуге мәжбүр.

– Физикалық дайындық кезінде кез келген жағдайда қызметтік міндеттерді орындауға дайын болу қажет. Жабдықтың жұмыс істеу принципін, оны басқара білуіңіз керек. Сонымен қатар әріптестеріңізбен және зардап шеккендермен ортақ тіл табу үшін эмоционалды икемділік пен қарым-қатынас дағдыларына ие болу керек. Бұл ретте ерлер ұжымы тарапынан қолдау үнемі сезіліп тұрады. Олар психологиялық және физикалық тұрғыдан қиын сәттердегі жағдайларды өз қолдарына алады, – дейді құтқарушы.

Наталья Гребенкина үшін адам өмірін құтқару  – мамандықтың басты сыйы. Бұл оның жұмысының осындай құндылығы бар екенін түсіну, қиындықтарды жеңуге көмектеседі. 

– Ең бастысы – қиындықтардан қорықпау, кез келген сынаққа дайын болу және әрқашан есте сақтау. Біздің жұмысымыздағы ең үлкен жетістік – құтқарылған өмір, – деп атап өтті Наталья Гребенкина.

Бүгінде ол өзін құтқару бөлімшелерінде қызмет етуге арнауды армандайтын жас қыздарға үлгі болып қала береді.