Гуманитарлық көмектің көлемі – жеті тонна, деп хабарлайды @Pavlodarnews.kz тілшісі. 

ҚР Президентінің жанындағы әйелдер істері және отбасылық-демографиялық саясат жөніндегі ұлттық комиссия «Күшіміз бірлікте!» атты су тасқынынан зардап шеккен өңірлерге гуманитарлық көмек көрсету және халықты қолдау бойынша акция жариялады.

Осы орайда, Павлодар облысы әкімінің жанындағы әйелдер істері және отбасылық-демографиялық саясат жөніндегі комиссия және жастар бастамаларын дамыту орталығының жәрдемі арқасында киіз үйлер, шатырлар, құрылыс материалдары, азық-түлік, гигиена құралдары және дәрі-дәрмектерден тұратын жеті тонна көлемінде гуманитарлық көмек жиналды.

14 мамыр күні мереке қарсаңында аталған гуманитарлық жүкті Қостанай облысы Жангелді ауданы Торғай ауылына жөнелту ұйымдастырылды.

–        Гуманитарлық көмек адамдар үшін үлкен маңызға ие. Бұл оларға физикалық күш беріп қана қоймайды, сонымен қатар оларды моральдік жағынан қолдап, өмірді жаңа серпінмен бастауға күш-жігер береді, – деді комиссия мүшелері.

Сондай-ақ, Ақтоғай ауданы Жалаулы ауылының тұрғындарына көмек жеткізу жоспарланған. Айта кетерлігі, Жалаулы ауылының тұрғындары үшін қаражат өңірлік комиссия мүшелерінің тікелей  көмегімен жиналды.