Алаяқтар бұл технологияны өз мақсаттарына пайдаланып, азаматтарды алдаудың жаңа тәсілдерін қолдануда, деп хабарлайды @Pavlodarnews.kz тілшісі.

Бұл туралы облыстық полиция департаменті хабарлады. Көшелерде, автобус аялдамаларында, көпқабатты үйлердің кіреберістерінде немесе жарнамалық тақталарда орналасқан QR-кодтарды сканерлемес бұрын олардың қауіпсіз екеніне көз жеткізу қажет. Қаскөйлер түпнұсқа QR-кодтардың үстіне жалған кодтарды жапсырып, пайдаланушыларды қауіпті сайттарға бағыттауы мүмкін.

Мұндай сілтемелердің мақсаты әртүрлі болуы ықтимал. Алаяқтар азаматтардың жеке деректерін немесе банк карталарының мәліметтерін қолға түсіруге тырысады. Кей жағдайда адамдар төлемді дұрыс жасап жатырмын деп ойлағанымен, ақша алаяқтардың есепшотына аударылып кетеді.

Күмәнді QR-кодтардың негізгі белгілері:

– QR-код басқа жарнаманың немесе хабарландырудың үстіне жапсырылған;

– хабарландыру ресми түрде рәсімделмеген;

– «Сыйлық алыңыз», «Тек бүгін», «Шұғыл сканерлеңіз» сияқты жедел әрекетке итермелейтін шақырулар қолданылады;

– ұйымның атауы немесе байланыс деректері көрсетілмеген.

Өзіңізді қалай қорғауға болады:

– қажеттілік болмаса, белгісіз QR-кодтарды сканерлемеңіз;

– сілтемеге өтпес бұрын сайттың мекенжайын мұқият тексеріңіз;

– күмәнді сайттарға жеке мәліметтеріңізді, банк картасының деректерін немесе SMS арқылы келген растау кодтарын енгізбеңіз;

– белгісіз қосымшаларды орнатпаңыз және оларға қосымша рұқсаттар бермеңіз;

– төлем жасаған кезде QR-кодтың ресми ұйымға тиесілі екеніне көз жеткізіңіз.

Егер күмәнді QR-кодты сканерлеп, жеке немесе қаржылық деректеріңізді енгізіп қойған болсаңыз, дереу банкке хабарласып, банк картасын бұғаттаңыз.

Полиция азаматтарды қырағылық танытып, цифрлық қауіпсіздік талаптарын сақтауға шақырады.