«Saryarqa samaly» газетінің 27 маусым, сейсенбілік нөмірінде жарық көретін негізгі материалдарға аңдатпа ұсынамыз.

Жазғы уақытта құтқарушылардың жұмысы көбейе түседі. Өзен-көлдің жағасындағы қауіпсіздік мәселесін қадағалайтын қызметкерлердің жұмыс барысын біліп қайттық. Қиын да жауапты қызмет туралы ертеңгі нөмірден толығырақ біле аласыздар. 

Бүгінде жас ветеринарларды кездестіру қиын. Бұл салада еңбектеніп жүргендердің дені – зейнеткерлік ауылына қадам басқандар. Статистикалық деректерге көз жүгіртсек, елімізде 7 мыңға жуық ветеринар жетіспейді. Ал облысымызға 120-дан астам маман қажет. Ветеринария саласында тағы қандай проблемалар бар? Бұл туралы газетіміздің бейсенбілік нөмірінен оқи аласыздар.

Елімізде 4 пайыздық жеңілдетілген автонесие бағдарламасы тоқтатылғаны белгілі. Үлгергендердің темір тұлпар аламын деген үміті ақталды. Қалыс қалғандар қаншама? Индустрия және инфрақұрылымдық даму министрлігі халықтың сұранысын толық қанағаттандыра алмайтындықтан енді автонесиелеуге бөлінген қаражатты облыс орталықтары мен ірі қалалардағы ескірген автобустарды жаңартуға бағыттамақ. Бұған халықтың пікірі қандай? Сарапшылар не дейді? Бұл сұрақтардың жауабын газетіміздің «Алаң» айдарынан таба аласыздар.

Ақсу қаласында осыдан алты жыл бұрын құрылысы басталған қалалық қазандықтың «жыры» әлі бітер емес. Қаланы қосымша жылумен қамтамасыз етуі тиіс маңызды нысанның іске қосылатын түрі де жоқ. Бұлай жалғаса берсе, металлургтер шаһарында Екібастұздағы жағдай қайталануы мүмкін. Мәселенің мән-жайын білгіңіз келсе, бейсенбілік нөмірді қалт жібермеңіз!

Тәрбие талбесіктен басталады. Отбасынан тамыр алатын бала тәрбиесіне ата-ана бірдей жауапты. Яғни, жас ұрпақтың бойына ізгілік дәнін себу, жақсы қасиеттерді сіңіру, сапалы білім алуына жағдай жасау, үлгілі ортаға түсуіне ықпал ету – ата-аналардың міндеті. «Сенімен болашақ» қоғамдық бірлестігі облыстық филиалының басшысы Хызыр Жанарыс осы және өзге де өзекті мәселелер туралы ойымен бөлісті. Сұхбатты бейсенбілік нөмірден таба аласыз.