Иттер көрмесіне қатысу үшін тіркелу жалғасуда, деп хабарлайды @Pavlodarnews.kz.

Павлодарда «Кубок севера KZ» ұлттық дәрежесіндегі барлық ит түрлерінің көрмесі өтеді. Шараны дәстүрлі түрде облыстық «Альянс» ит өсірушілер қоғамдық бірлестігі ұйымдастырады. 

– Әрбір көрме өзіндік ерекшелігімен таң қалдырады. Біз өңірдегі кинологияны алға тартып, танымал етуге ұмтыламыз. Осындай иттер көрмесіне Қарағанды, Астана, Өскемен және басқа да қалалардан тамашалауға келіп тұрады, – деді қоғамдық бірлестіктің басшысы Данара Сейітқанова. 

Оның сөзінше, бүгінде швейцаралық ақ төбет, йоркшир терьері, кішкентай шпиц, джек-рассел терьер, мопс, лабрадор ретривер сияқты тұқымды иттердің иелері көрмеге тіркелді. 

– Иттер груминг (шаш үлгісі), қимыл әрекеттері, дайындық сатысы бойынша бағаланады. Әрине, иттің әдемілігі ескеріледі, –  деді Данара Сейітқанова. 

Көрмеге қатысу үшін тіркелу 20 қыркүйекке дейін жалғасады. Төрт аяқты жануарларды Теміртау қаласынан келетін CAC-Cacib сарапшысы Елена Васильева бағалайды. Көрме 22 қыркүйекте болады деп жоспарланған, алайда өткізілетін орны жайлы ақпарат қосымша кейін беріледі.