Өңірдегі сайлау учаскелері тура сағат 20:00-де жабылды, деп хабарлайды @Pavlodarnews.kz тілшісі.

Өңірде 501 сайлау учаскесі жұмыс істеді. Таңғы сағат жетіде учаскелер ашылып, Қазақстан Республикасының Мемлекеттік Әнұраны орындалғаннан кейін комиссия мүшелері сайлаушыларды тіркеуге және бюллетеньдерді беруге кірісті.

Сайлауға Павлодар облысының әкімі Асайын Байханов та қатысты. Ол жаңа бірпалаталы Құрылтайға 145 депутат сайланатынын еске салды. Мандаттарға жеті саяси партиядан кандидаттар үміткер болды.

Павлодар облысындағы 501 сайлау учаскесінде дауыс беру барысын екі мыңнан астам бақылаушы қадағалады. Олар жұмысқа кіріспес бұрын арнайы оқыту мен нұсқамадан өтті. Бақылаушылардың негізгі міндеті – белгіленген дауыс беру тәртібі мен заңнама талаптарының сақталуын қадағалау. «Дауыс» өңірлік коалициясының мәліметінше, дауыс беру барысында облыста заң бұзушылықтар тіркелмеген. Сондай-ақ бақылаушылар павлодарлықтардың жоғары белсенділігін атап өтті.

Мүмкіндігі шектеулі сайлаушылар үшін арнайы жағдай жасалды. Мәселен, Павлодардағы №97 сайлау учаскесінде көру қабілеті бұзылған азаматтардың өз бетінше дауыс беруіне арналған арнайы құрылғы пайдаланылды. Облыстың басқа учаскелерінде де жүріп-тұруы шектеулі азаматтарға қажетті жағдай қарастырылды.

Ұлы Отан соғысының 100 жастағы ардагері Сергей Выжутовичке дауыс беру жәшігі үйіне жеткізілді. Ол қазақстандықтарға бейбіт аспан тіледі.

Павлодар облыстық перинаталдық орталығында арнайы сайлау учаскесі жұмыс істеді. Мұнда жүкті әйелдер мен босанғаннан кейін орталықта жатқан аналар Құрылтай сайлауына қатысып, өз таңдауын жасады.

Сайлау учаскелеріне павлодарлықтар отбасыларымен, спортшылар командаларымен, ал әріптестер ұжымдарымен келді. Павлодарда орналасқан екі әскери бөлімнің мерзімді әскери қызметшілері де таңдаған партияларына дауыс берді. Сарбаздардың біріне дәл осы күні 21 жас толды.

Дауыс беруге «Ертіс» футбол клубының ойыншылары мен «Ertis» волейболшылары қатысты. Екібастұзда NAIZA TEAM кәсіби жауынгерлері өз таңдауын жасады. Кейбір спортшылар сайлау учаскесіне чемпиондық белбеулерімен келді.

Баянауыл ауданында халық ансамблінің мүшелері ұлттық киіммен дауыс берді. Сайлау учаскелерінде азуы алты қарыс жолбарыс пен Чарли Чаплин бейнесіндегі кейіпкерлерді де кездестіруге болды. Ал Мичурин ауылының тұрғындары Павлодардың Ертіс өңірі әйгілі картоп бейнесіндегі костюмдерді таңдады.

Сайлау учаскелерінде кеңейтілген ауыл шаруашылығы жәрмеңкелері ұйымдастырылды. Ал дауыс беру орындарына Павлодар, Ақсу және Екібастұз қалаларындағы қоғамдық көлікпен тегін жетуге мүмкіндік жасалды.

Өңірлік бақылаушылардың мәліметінше, Павлодар облысында дауыс беру барысында заң бұзушылықтар тіркелген жоқ.