Елші Дэниел Розенблюм 2022 жылдың қарашасынан бері Қазақстандағы миссияға жетекшілік етуде, деп хабарлайды @Pavlodarnews.kz тілшісі.

2025 жылы 9 қаңтарда АҚШ-тың Қазақстандағы Төтенше және өкілетті елшісі Дэниел Розенблюм жұмыс сапарымен С.Торайғыров атындағы облыстық әмбебап ғылыми кітапханаға келеді. Оның жетекшілігімен АҚШ пен Қазақстан арасындағы қарым-қатынас жаңа деңгейге көтеріліп, сауда, инвестиция, халықтар арасындағы байланыс, университеттер серіктестігі мен қауіпсіздік салаларында айтарлықтай табыстарға қол жеткізілді. Ол Қазақстандағы миссия командасымен бірге тығыз жұмыс істеп, дипломатиялық байланыстарды нығайтып, өзара түсіністікті арттыруға және екі елдің ортақ мүдделерін дамытуға үлес қосуда.

Елші облыстық кітапхананың жұмысымен танысып, цифрлау орталығына, оқу  залдарына, Абай бұрышы, коворкинг, «Айна» көркемсурет галереясы барады. Сонымен қатар, Makerspace және American Corner Pavlodar шығармашылық алаңдары залдарының жұмыстарымен танысып, Speaking club (Сөйлесу клубы) еріктісімен, Торайғыров университеті «Fellow» алмасу бағдарламасына қатысушысы Ghada Rahman (Гада Рахман), клуб қатысушыларымен және Alumni халықаралық алмасу бағдарламасының түлектерімен кездеседі.

Халықаралық кітап секторы «Америка бұрышы» (2012) және Maker Space Pavlodar (2021) жобаларын жүзеге асыруда. Америка бұрышында алмасу білім беру бағдарламаларының түлектерімен кездесулер, ағылшын тілін тегін үйрену клубтары, ойындар мен пікірталас клубтары жұмыс істейді. MovieClub, KidsClub, HiFiveClub, SpellingBeeClub, үстел ойын қызығушылықтар клубтары бар. Аудио және бейне ресурстардың, оқу бағдарламаларының және үстел ойындарының қоры құрылған. Гёте-Институтпен байланыс орнатылған. 

Кездесу барысында Халықаралық кітап секторының кітапханашысы және америка бұрышының координаторы Дайана Қайырбекова сектор жұмысымен толығырақ таныстырып, келешектегі жоспар мен жобалар жайлы бөліседі.