Павлодар облысының әкімі Асайын Байханов Ақсу қаласына барды, деп хабарлайды @Pavlodarnews.kz тілшісі.

Павлодар облысының әкімі Асайын Байханов жұмыс сапарымен Ақсу қаласына барып, алдағы 2026-2027 жылдардағы күзгі-қысқы маусымға дайындық барысымен танысты. Сапар барысында өңір басшысы Ақсу жылу-энергетикалық кешендеріндегі жөндеу жұмыстары мен инфрақұрылымдық жобалардың орындалуын тексерді.

АО «ЕЭК» бас директоры Дүйсен Мерғалиев айтуынша, кәсіпорында алдағы жылыту маусымына дайындық аясында бірқатар күрделі және ағымдағы жөндеу жұмыстары жоспарланған. Қазіргі уақытта кәсіпорын қоймаларында 7 мың 200 тонна көмір және 1 мың 729 тонна мазут қоры бар. Жалпы жылдық көмір тұтыну көлемі 150 мың тоннаны, мазут тұтыну 3,5 мың тоннаны құрайды.

Кәсіпорында төртінші конвейерге күрделі жөндеу жүргізу, жылу энергиясын есепке алу жүйесін жаңғырту, диірмен желдеткіштерінің тығыздау жүйесін ауыстыру және басқа да техникалық жаңарту жұмыстары қолға алынбақ. Жөндеу науқанына мердігер ұйымдар мен ERG Service жөндеу бригадалары тартылады. Барлық жұмыстарды 30 қыркүйекте аяқтау көзделуде.

Өңір басшысы жөндеу жұмыстарының мерзіміне ерекше назар аударып, барлық жұмыстарды 10 қыркүйекке дейін толық аяқтауды тапсырды.

— Мұндай мерзімдерге рұқсат бермеймін. Графикті қайта қарап шығыңыздар. Барлық жұмыстар ең кеш дегенде 10 қыркүйекте аяқталуы керек. Одан кейін ешқандай жөндеу жұмыстары қалмауы тиіс, — деді Асайын Байханов.

Кездесу барысында ERG компаниясымен жасалатын ұзақмерзімді меморандум аясында Ақсу қаласының әлеуметтік және инженерлік инфрақұрылымын дамыту мәселелері де талқыланды. Атап айтқанда, көшелерді асфальттау, аулаларды абаттандыру, мектептерді жөндеу және РОК-2 жобасына қаржы бөлу мәселесі көтерілді.

Сонымен қатар, резервтік электр қуатын тарту және қазандықтағы жанарғыларды ауыстыру бойынша екі маңызды жобаны жаз мезгілінде іске асыру жоспарланып отыр.

Жиында өткен жылы болған технологиялық ақаулар да талқыланды. Мамандардың мәліметінше, қазандықтардың бірінде мысық электр жабдығына кіріп кетіп, қысқа тұйықталу орын алған. Соның салдарынан апатты жағдай туындап, электр қуаты шамамен алты сағатқа өшкен. Қазіргі уақытта қауіпсіздік шаралары күшейтіліп, нысандар екі секцияға бөлінген.