Бүгін кеншілер шаһарында Теміржолшылар күні кең көлемде тойланады, деп хабарлайды @Pavlodarnews.kz тілшісі.

Осыған орай Екібастұз қаласының әкімі Аян Бейсекин тұрғындарға мерекелік концертке қатысты үндеу жасап, қауіпсіздік шараларын сақтауға шақырды.

Қала әкімінің айтуынша, мерекелік іс-шара өтетін аумақта көлік қозғалысына уақытша шектеу енгізіледі. Сондай-ақ концерт өтетін алаңның маңындағы автотұрақтар уақытша қолжетімсіз болады. Осыған байланысты тұрғындарға мүмкіндігінше мерекелік алаңға жаяу келу ұсынылады.

– Сіздерден мүмкіндігінше мереке өтетін алаңға жаяу келулеріңізді сұраймын. Өйткені концерт өтетін аумақтың маңындағы автотұрақтар қолжетімсіз болады және көлік қозғалысына уақытша шектеу қойылады, – деді Аян Бейсекин.

Қала басшысы тұрғындарды көпшілік жиналатын орындарда қауіпсіздік талаптарын сақтауға да шақырды. Оның айтуынша, адам көп жиналатындықтан, мүмкіндігінше кішкентай балалар мен балалар арбасын алып келмеген жөн.

Сондай-ақ тұрғындарға қоғамдық тәртіпті сақтап, айналасындағыларға мұқият болу және қандай да бір жағдай туындаса, полиция қызметкерлеріне немесе іс-шараны ұйымдастырушыларға жүгіну ұсынылды.

Айта кетейік, Теміржолшылар күніне арналған мерекелік концерт барысында қоғамдық қауіпсіздікті құқық қорғау органдары мен тиісті қызметтердің қызметкерлері қамтамасыз етеді.