Ташкентте өнер көрсету құқығына ұжым 2025 жылы облыстық кезеңде жарқын жеңіске жетуінің арқасында ие болды, деп хабарлайды @Pavlodarnews.kz тілшісі.

24 наурыз күні Өзбекстан астанасында Орталық Азия елдерінен келген дарынды ұжымдарды біріктірген «ZHULDYZ ART KAZAKHSTAN» халықаралық конкурс-фестивалі өтті.

Павлодар облысын беделді шығармашылық форумда Ақтоғай ауданынан келген «Тұмарлан» би тобы лайықты түрде таныстырды. Ұжымның жетекшісі – хореограф Жібек Ахтанова.

Байқау бағдарламасы бірнеше жанрды қамтыды, оның ішінде хореография ерекше орын алды. Бұл аталымда Қазақстанның әр өңірінен, сондай-ақ Қырғызстан мен Өзбекстаннан келген 23 ұжым өз өнерін көрсетті.

Құрамында 13-15 жас аралығындағы 12 қатысушысы бар «Тұмарлан» би тобы жоғары дайындық деңгейін, үйлесімділікті, мәнерлілікті және сахналық образды терең түсінетінін көрсетті. Олардың «Қара жорға сазы» биі жарқын қойылымымен, ұлттық нақышымен және эмоциялық әсерімен ерекшеленіп, қазылар алқасы мен көрермендерді бейжай қалдырмады.

Тартысты өткен байқау қорытындысы бойынша Ақтоғай ауданынан келген ұжым фестивальдің ең жоғары марапаты – Гран-приді жеңіп алды.

– Бұл жеңіс ауылдық жерлерде де өңір мен ел намысын халықаралық деңгейде лайықты қорғай алатын нағыз таланттардың өсіп келе жатқанын дәлелдейді. «Тұмарланның» жетістігі – тынымсыз еңбектің, шығармашылық ізденістің және өнерге деген адалдықтың нәтижесі, – деді хореограф Жібек Ахтанова.

Ұжымның жеңісі – тек Ақтоғай ауданының ғана емес, бүкіл Павлодар облысының мақтанышы.