Өңірде жүзге жуық инвестициялық жоба жүзеге асырылып, өндіріс көлемі артып келеді, деп хабарлайды @Pavlodarnews.kz тілшісі.

Облыстық индустриялық-инновациялық даму басқармасының мәліметінше, 2025 жылдың қорытындысы бойынша өңірге 1,28 триллион теңге инвестиция тартылып, өсім 147 пайызды құрады. Бұл көрсеткіш өңірге республика бойынша екінші орын алуға мүмкіндік берді. Биылғы жоспар – 1,4 триллион теңге. 

Қазіргі уақытта өңірде 85 инвестициялық жоба жүзеге асырылып жатыр.

– Индустриялық дамудың негізгі алаңы – «Павлодар» арнайы экономикалық аймағы. Мұнда 39 кәсіпорын тіркелген, оның 23-і өнім өндіруде. Кәсіпорындар 117 түрлі өнімді 11–12 елге экспорттайды. Ірі жобалардың бірі – «Ертіс» гидрометаллургиялық комбинаты. Жоба іске асқанда жылына 15 тонна алтын өндіру және 500 жаңа жұмыс орнын ашу жоспарланып отыр, – делінген хабарламада.

Мамандардың айтуынша, бұл бастамалар өңірдің индустриялық әлеуетін күшейтіп, Павлодарды ірі өндірістік орталықтардың біріне айналдыруға мүмкіндік береді.