Соңғы үш жыл ішінде жеңімпаз атанған студенттер мен бітіруші курс түлектеріне қатысуға шектеу қойылған, деп хабарлайды @Pavlodarnews.kz тілшісі.

Облыстық білім беру басқармасы баспасөз қызметінің мәліметінше, «Қазақстан Республикасы колледждерінің Үздік 100 студенті» республикалық конкурсының өңірлік кезеңі басталды. 

Іріктеу барысында қатысушыларға бірқатар талаптар қойылады. 

– Үміткер бітіруші курста (3 немесе 4 курс) оқымауы тиіс. Сондай-ақ соңғы үш жылда конкурс жеңімпазы атанған студенттер қайта қатысу құқығынан айырылады, – деді ұйымдастырушылар.

Бағдарламаға Павлодар облысын қоса алғанда, Қазақстанның барлық өңірлеріндегі колледж студенттері қатыса алады. Үміткерлер алты негізгі бағыт бойынша бағаланады:

• «Қоғам белсенділері» – еріктілер мен студенттік өзін-өзі басқару мүшелері;
• «Кәсіби мамандар» – WorldSkills және кәсіби шеберлік байқауларының қатысушылары;
• «Зияткерлер» – ғылыми жобалар мен олимпиадалардың жүлдегерлері;
• «Белсенді жастар» – мемлекеттік жастар бағдарламаларына қатысушылар;
• «Өнерлі студенттер» – шығармашылық ұжым мүшелері;
• «Инноваторлар» – стартап және инновациялық жоба авторлары.

Өңірлік кезеңге арналған материалдар 19 маусымға дейін қабылданады.