Кейбір жөндеу жұмыстары соңғы 15 жылда алғаш рет жасалып отыр, деп хабарлайды @Pavlodarnews.kz тілшісі. 

Облыстық денсаулық сақтау басқармасының мәліметінше, былтыр 19 медициналық мекемеге күрделі жөндеу жүргізіліп, оған 1,9 миллиард теңгеден астам қаражат бөлінген. 2025 жылы он нысанға күрделі жөндеу жүргізуге 1,5 миллиард теңге жұмсалады.

Май ауданының аудандық ауруханасында жылыту жүйесін ауыстыру, Аққулы ауданының ауруханасында ішкі су құбыры, кәріз, жылыту және желдету жүйелерін күрделі жөндеу, Жолболды ауылының медициналық пункті, Пресное ауылындағы фельдшерлік-акушерлік пункт, Майқайың ауылындағы учаскелік аурухананың емханасы, сондай-ақ облыстық нысандар – Сұлтанов атындағы аурухананың офтальмология бөлімін күрделі жөндеу, фтизиопульмонология орталығы ғимаратындағы еденді ауыстыру және психикалық денсаулық орталығындағы терезе блоктарын ауыстыру жоспарланған.

Мысалы, Железин аудандық ауруханасының бас дәрігері Роман Пактың айтуынша, мердігер ғимараттың үш қабатындағы қабырғаларды сылап, сырлауға, жұмсақ шатырды ауыстыруға, терезе маңдайшаларын оқшаулап орнатуға, линолеум мен кафельді ішінара ауыстыруға, бас кіреберіс пен қабылдау бөлімін, жертөлеге кіретін күмбездерді жөндеуге міндеттелген.

Бұл емдеу мекемесінде 30 төсек-орны бар бір жалпы бейіндегі бөлімше бар.

Еске сала кетейік, 2023 жылдан бастап облыстың шалғай ауылдарындағы медицина ұйымдарына арналған арнайы көліктер кезең-кезеңімен жаңартылып келеді. 2025 жылы бұл мақсатқа 900 миллион теңгеден астам қаржы бөлінген.