Орталық жағалауда өткен қорытынды шараға мемлекеттік органдар, еріктілер мен жастар қатысты, деп хабарлайды @Pavlodarnews.kz тілшісі.

Орталық жағалауда Халықаралық нашақорлыққа және есірткі бизнесіне қарсы күрес күніне арналған «Есірткісіз болашаққа ұмтыл» айлығының салтанатты жабылу рәсімі өтті. Іс-шара «Заң және тәртіп» тұжырымдамасы аясында ұйымдастырылды.

Шараға мемлекеттік органдардың, қоғамдық ұйымдардың, полицияның, еріктілердің, жастардың және қала тұрғындарының өкілдері қатысты.

Бағдарлама барысында Ertis Promenade алаңында интерактивті аймақтар жұмыс істеді. Қатысушылар спорттық белсенділіктерге қатысып, кеңес беру алаңдарын аралап, құқық қорғау органдарының арнайы техника көрмесімен танысты.

– Бүгінде жастарға есірткінің зияны туралы айтып қана қою жеткіліксіз. Оларға спорт, шығармашылық, еріктілік сияқты нақты балама ұсыну қажет. Жастар пайдалы іске тартылған сайын теріс ықпалға ұшырау қаупі азаяды, – деді ерікті Алина Смағұлова.

Кеңес беру аймақтарында психикалық денсаулық және отбасыны қолдау орталықтарының мамандары тұрғындарға тәуелділіктің алдын алу мен психологиялық қолдау мәселелері бойынша түсіндіру жұмыстарын жүргізді.

Облыстық Ақпарат және қоғамдық даму басқармасының жастар және отбасы істері бөлімінің басшысы Жаннұр Ахметжанованың айтуынша, нашақорлықтың алдын алу өңірдегі мемлекеттік жастар саясатының негізгі бағыттарының бірі болып қала береді.

– «Есірткісіз болашаққа ұмтыл» айлығы мемлекеттік органдардың, үкіметтік емес ұйымдардың және жастардың күшін біріктірген маңызды алаңға айналды. Бұл жас ұрпақтың денсаулығы мен қауіпсіздігі бүкіл қоғам үшін ортақ құндылық екенін көрсетті, – деді ол.

Іс-шара барысында айлықтың ең белсенді қатысушылары, еріктілер, сурет байқауы мен футбол турнирінің жеңімпаздары алғыс хаттармен және марапаттармен марапатталды. Көрермендер үшін шығармашылық ұжымдардың концерті, таэквондо мен каратэ федерацияларының көрсетілімдері және полицияның арнайы бөлімшелерінің қойылымдары ұсынылды.

Кештің басты қонағы – әнші Серік Мұсалымов болды. Оның концерті мерекелік бағдарламаның қорытындысына айналды.

«СӨС үшін жастар» жастар қоғамдық бірлестігінің жетекшісі Диас Сағитовтың айтуынша, айлық аясында Павлодар облысының барлық өңірінде 20-дан астам спорттық турнир, жастар акциясы, дәріс, кездесу және шығармашылық жоба өткізілген.

– Бұл бағыттағы жұмыс мұнымен аяқталмайды. Жыл бойы жастарды спортқа, еріктілікке және қоғамдық бастамаларға тартуға бағытталған жобаларды жалғастырамыз, – деді Диас Сағитов.

Ұйымдастырушылардың пікірінше, мұндай бастамалар жастар арасында салауатты өмір салтын насихаттап қана қоймай, қоғамда заң мен тәртіп құндылықтарын нығайтуға да ықпал етеді.