Сода зауытының идеясы пайда болғаннан бері арнайы экономикалық аумақта 20-дан астам жаңа қатысушы тіркелген, деп хабарлайды  @Pavlodarnews.kz тілшісі.

«Павлодар-Сода» зауыты жылына 200 мың тонна «А» маркалы кальций қосылған соданы өндіруді жоспарлауда. Ел көлемінде сұраныс 400-450 мың тоннаны құрайды. Қажетті шикізаттар – тұзды Үлкен Қалқаман және Тұздысор көлдерінен, әктасты Керегатастан, ал аммиакты сырттан сатып алмақ. Алынған өнім шыны бұйымдары, хром қосылыстары, натрий фосфаттеры өндірісінде шикізат ретінде қолданылатын болады. Негізгі тұтынушы – «Қазақстан алюминийі» зауыты.

Бүгінгі таңда кәсіпорын үшін арнайы төселген құбырлар қалған. Оларды АЭА-ның басқа қатысушылары пайдаланатын болады.

– Бір апта бұрын жиналыс өткіздім. Желілер бойынша мәселені талқыладық. Сол жерде өткізілген кәрізді басқа кәсіпорындар пайдалану туралы шешім қабылданды. Олардың саны – 36, 12-сінде су бұру жүйесіне қатысты мәселе бар. Трамвай желісі зауыт үшін ғана емес, арнайы экономикалық аумаққа дейін болды, – деді аймақ басшысы. 

Асайын Байханов экспорттық мүмкіндіктерді жақсарту үшін қосымша желі қажет екенін және инвестиция құйылатынын атап өтті. 

– Әлеуетті инвестормен кездесу болды. Серіктестік бойынша нақтылау енгізілмеді. Қаржыландыруға байланысты қиындық бар. 200 миллион доллардан асады. Серіктесті іздеуде және қоғамдық тыңдау өткізу керек, – деді аймақ басшысы. 

Еске сала кетейік, «Павлодар-Сода» зауыты осыдан бірнеше жыл бұрын қолға алынған. Аталмыш кәсіпорынды салу арқылы өңірде отандық және әлемдік сұранысқа ие кальциленген соданың 200 мың тоннасы шығарылмақ. Аталмыш өндіріс орнын іске қосу үшін мемлекеттік бағдарлама аясында «Павлодар» арнайы экономикалық аумағы маңына арнайы инженерлік-коммуникациялық желілер тартылды.