Байқау өнердің нағыз мерекесіне айналып, бүкіл әлемнен бишілер мен би өнерін сүйер қауымды жинады, деп хабарлайды @Pavlodarnews.kz тілшісі.

Ташкент қаласында өткен «I LOVE to DANCE» халықаралық хореографиялық байқауына Оқушылар сарайының «Жұлдыздар» қазіргі заманғы би студиясы қатысты. Байқауды Астана қаласындағы «CREATIVE FEST» халықаралық шығармашылық бірлестігі ұйымдастырды. Оған Астана қаласының Мәдениет департаменті мен Алматы қаласындағы Қазақстанның би порталы «ART – DANCE» қолдау көрсетті.

Қатысушылар би өнерін тек техникалық шеберлікпен ғана емес, жан-тәнімен орындап, бидің бүкіл әлемді біріктіретін күшін тағы бір мәрте дәлелдеді.

– Фестивальдің басты мақсаты – балалар мен жастар шығармашылығын қолдау, олардың шығармашылық идеяларын жүзеге асыруға жағдай жасау, көпұлтты өнерді дамыту және мәдени алмасуды ынталандыру. Бұл мақсаттар толығымен орындалып, әрбір би тобы өз өнерін жоғары деңгейде паш етті, – деді облыстық білім беру басқармасының баспасөз қызметі.

«Жұлдыздар» студиясы эстрадалық, халықтық және заманауи би номинацияларында өнер көрсетті. Қатысушылар екі жас санатында – 9-12 жас және 13-16 жас аралығында жарысқа түсті. Бұл әрбір өнерпазға өздерінің ең үздік қасиеттерін көрсетуге және шығармашылық қабілеттерін халықаралық сахнада дәлелдеуге мүмкіндік берді.

Студияның жоғарғы тобы «Ақ баян» биімен гран-при жеңіп алып, «Пробуждение» биімен бірінші орынды иеленді. Орта топ «Арлекино» және «Қызғалдақтар» билерімен де бірінші орынға қол жеткізді. Екі топтың ортақ жеңісі «Афроритмы» аралас биімен толықты.

– Бұл байқау әрбір қатысушы үшін тек жаңа жетістік қана емес, сонымен қатар «Жұлдыздар» студиясының халықаралық аренада Қазақстанның би өнерін жоғары деңгейде ұсынуға жасаған тағы бір қадамы болды. Біздің би тобы әр жеңісімен шыңдала түсуде. Алда жаңа байқаулар, фестивальдер мен шығармашылық жобалар күтіп тұр. Студияның жоспарлары өте ауқымды, біз Қазақстанда ғана емес, шетелдік би сахналарын да бағындыруды мақсат етеміз, – делінген хабарламада.

Әрбір қатысушы дипломдар, кубоктар және медальдармен марапатталды. Бишілер өздерінің кәсібилігі мен жарқын өнерлерін көрсетіп, қазылар алқасының жоғары бағасын алды. Ал студия жетекшісі Анжела Тактаулова талантты бишілерді тәрбиелеп, студияның дамуына қосқан үлесі үшін Алғыс хатпен марапатталды.