@Pavlodarnews.kz тілшісі көмек көрсетудің жеделдігі неге байланысты екенін анықтады.

«103» нөміріне түскен барлық қоңыраулар шұғылдық бойынша: бірінші санаттан төртінші санатқа дейін бөлінеді. Бұл медициналық қызметкерлерді қай шақыртуға бірінші кезекте жіберу қажеттігін анықтау үшін жасалады. 

Жедел жәрдем үшін басымдық — бірінші санаттағы шақыртулар, яғни науқастың өміріне нақты қауіп төнген жағдайлар. Мұндай жағдайларға жол-көлік оқиғалары, үйде босану, кесілген жарақаттар, күйік пен улану, жүрек соғысының тоқтауы немесе тыныс жолына бөгде заттың кіріп кетуі жатады. Осындай шақырту түскеннен кейін медицина қызметкерлері 10 минут ішінде жетуі тиіс, алайда Павлодар облысында бұл норма 7-8 минутты құрайды.

– Екінші санаттағы шақыртуларға науқастың денсаулығына қауіп төнгенімен, біраз уақыт медициналық көмексіз шыдай алатын жағдайлар жатады, – деп түсіндірді облыстық жедел жәрдем станциясы басшысының орынбасары Ирина Мищенко. – Мұндай шақыртуларға әдетте 15 минут ішінде барамыз. Үшінші санаттағы шақыртулар – науқастың денсаулығына қауіп бар, бірақ дәрігерлердің шұғыл араласуы аса қажет емес жағдайлар. Мұндай қоңыраулар 30 минут ішінде орындалады.

Төртінші санаттағы шақыртулар – науқастың өмірі мен денсаулығына тікелей қауіп төндірмейтін жағдайлар. Мұндай шақыртулар емханаларға беріледі, онда арнайы мобильді бригадалар жұмыс істейді. Олар қоңырау өңделгеннен кейін 60 минут ішінде қызмет көрсетуі тиіс.

– Кейбір науқастар «103» нөміріне қоңырау шалған сәттен бастап уақытты есептейді, – дейді Ирина Мищенко. – Алайда диспетчер шақыртуды қабылдап, түскен ақпаратты өңдеп, оны медициналық бригадаға беруі қажет екенін түсіну керек. Көмек көрсетудің жеделдігі осыған байланысты. Шақыртуды өңдеуге 5 минутқа дейін уақыт кетеді.

Шақырту орны жедел жәрдем станциясына жақын болғанымен, бұл дәрігерлер 2 минутта жетеді дегенді білдірмейді. Линияда жүрген барлық жедел жәрдем бригадалары күтіп отырмайды, олар үнемі қала мен өңір бойынша қозғалыста болады. Шақырту орнына алдыңғы шақыртудан жаңа ғана босап шыққан ең жақын бригада жіберіледі.