Аймақ басшысы Асайын Байханов ауыл мектептері үшін жалпы білім беретін пәндер бойынша республикалық олимпиада жүлдегерлерін марапаттады, деп хабарлайды  @Pavlodarnews.kz тілшісі. 

Облыс әкімі баспасөз қызметінің мәліметінше, республикалық пәндік олимпиаданы ауыл мектептерінің оқушылары арасында екінші мәрте өткізуде. Биылғы жылдың қорытындысы бойынша облыстың ауыл мектептері оқушыларының құрама командасы жаратылыстану-математика бағыты бойынша тоғыз медаль жеңіп алды: бір алтын, төрт күміс, төрт қола медаль және республикадағы «Үздік олимпиадалық команда - 2024» атағын иеленді.

Аймақ басшысы жас дарындарды жетістіктерімен құттықтап, алғысын білдірді.

– Мен Павлодар облысы командасының биыл үздік атанғанын мақтан тұтамын. Бұған ұстаздарыңыз бен ата-аналарыңыздың қосқан үлесі зор. Сіздердің жеңістеріңізбен өңіріміздің білім сапасы жоғары бағаланады, –- деді облыс әкімі. 

Асайын Байханов олимпиада жеңімпаздары мен жүлдегерлеріне Алғыс хаттар мен ақшалай сыйақы табыс етіп, Павлодар облысында балалардың жан-жақты өзін-өзі дамытуға, болашақ мамандығы бойынша халықаралық стандарттар деңгейінде білім алуға барлық жағдай жасалып жатқандығын атап өтті.

Соңғы екі жылда өңір оқушылары республикалық деңгейде 170-тен астам және әлемдік деңгейде 30-дан астам медаль жеңіп алды.