Жәбір көрсеткен тұрғын ұсталды, деп хабарлайды @Pavlodarnews.kz.

Әлеуметтік желіде 13 жасар қызға бейтаныс әйел шабуылдағаны туралы ақпарат таралды. Хабарламада Торайғыров көшесі бойымен келе жатқан әйел қыздың артынан білдірмей жақындап, оның шашын жұлқылап, жерге құлатты деп жазылған. Пост авторының пайымдауынша, жасөспірімді ұрып-соғу кезінде ешкім көмекке келген жоқ.

Шабуыл туралы ақпаратты бала құқықтары жөніндегі өңірлік уәкіл Сәуле Шакенева растады.

– 11 шілдеде кәмелетке толмағанға дене жарақатын салған әйелдің жеке басын полиция жедел түрде анықтады. Жәбірленуші қызға психологтың көмегі ұсынылады. Қыз отбасының қамқорлығы мен сүйіспеншілігін ең тиімді оңалту деп санайды, – деді Сәуле Шакенева.

Өңірлік уәкілдің айтуынша, полиция департаменті ҚК-тің 109-1- бабының екінші бөлігі «Ұрып-соғу» бойынша қылмыстық іс қозғап, сот-медициналық сараптама тағайындаған. 

Еске сала кетейік, Екібастұзда тұрғын үйдің ауласындағы ойын алаңында әйелдің басқа балаға дөрекілік танытып, оған айғалап, ұрысып жатқан сәті түсірілген видео әлеуметтік желіде таралды. Кадрларда әйел балаға қол көтеріп, денесін жұлқылап, басынан ұрып жатқаны айқын көрінеді. Полиция әйелдің кәмелетке толмаған балаға дене жарақатын келтіру фактісі бойынша тексеруді бастады.