Еліміздің тәуелсіздік алғанына 33 жыл толды, деп хабарлайды @Pavlodarnews.kz.

Аймақ басшысы құттықтау сөздерінде 16 желтоқсан – біз ата-бабаларымыздың егеменді мемлекет туралы арманын жүзеге асыруда ерекше рөл атқарған ұлттық батырларға құрмет көрсету күні екендігін атап өтті. Ол Мемлекет басшысы Қасым-Жомарт Тоқаевтың «Тәуелсіздік бәрінен қымбат» атты мақаласында «Қазақ елі үшін Тәуелсіздіктің мәні де, маңызы да айрықша. Тәуелсіздіктен артық құндылық жоқ. Бұл ең қымбат қазына» деп айтқан сөздерін келтірді.

– Тәуелсіздік - кең көсілген байтақ жеріміз, ананың ақ сүтімен бойымызға дарыған қастерлі тіліміз және барлық қиындықтардан халқымызды сүріндірмей алып келе жатқан бейбітшілік пен береке – бірлігіміз. Сондықтан еліміздің бүгіні мен келешегі үшін осы құндылықтарды біз көздің қарашығындай сақтауымыз керек, – деп жазды Асайын Байханов Instagram парақшасында.

Ол аймағымыздың дамуына сүбелі  үлес қосып жатқан әр тұрғынға еліміздің өркендеуі жолында сіңірген жасампаз еңбегі үшін алғысын білдірді. 

– Сіздерге мықты денсаулық, амандық, барлық бастамаларда сәттілік, ертеңге сенімділік тілеймін! Қастерлі Отанымыз-Қазақстан өркендей берсін! – деді облыс әкімі. 

Айта кетейік, Тәуелсіздік күні мерекесі әр жылдың 16 желтоқсанында аталып өтеді.