Арнайы сарапшылар салалық басқармаларды еріктілермен дұрыс байланыс құруға үйретеді, деп хабарлайды @Pavlodarnews.kz

Бұл туралы Өңірлік коммуникациялар қызметінде өткен баспасөз конференциясында «Ұлттық волонтерлік желі» ЗТБ атқарушы директоры Татьяна Миронюк мәлім етті. 

– Бұл екі күндік семинар болады. Алғашқы күні мемлекеттік органдармен кездесіп, оларға еріктілермен өзара қарым-қатынас құрудың қыр-сырын айтамыз. Еріктілер ұйымдарымен тығыз байланыста жүретін білім беру, денсаулық сақтау басқармалары, құқық қорғау органдарының өкілдеріне дұрыс әрекеттесудің дағдыларына үйретеміз,– деді Татьяна Миронюк.

Оның сөзінше, «Birgemiz: áreket ýaqyty» волонтерлік саласындағы іс-шаралар кешенін ұйымдастыру» жобасын іске асыру шеңберінде бүкіл республика бойынша волонтерлікті мемлекеттік қолдау стандартын біржолғы енгізу мақсатында 17 облыста және республикалық маңызы бар үш қалада іс-шаралар мен кездесулер өткізіледі. Стандарттарды соңғы рет 2020 жылы құрастырған еді, алайда ол әдістемелік нұсқаулық ретінде ғана жиналып, облыстарға таратылған болатын. 

– Енді 2024-2027 жылға арналған жол картасына бұл стандарттар кіреді деп үміттенеміз. Бүгінде стандартқа тиісті тәжірибе мен ақпаратты жинастыру үшін қалаларды аралап отырмыз. Яғни, кейс жинап, стандарттарды одан әрі дамыту үстіндеміз,– деп түсіндірді Татьяна Миронюк.

Павлодар облысы сарапшылар келіп отырған бесінші өңір болып отыр. 

–Қазақстанда 600-ге жуық волонтерлік ұйым және 200 мыңнан астам ерікті бар. Жыл сайын еріктілер қатары толығып, мейрімді іспен айналысатындар көбейіп келе жатыр. Оның 80 пайызы ресми түрде тіркелмеген,– деді спикер.– Нақты Павлодар облысына келсек, бұл жерде іздеу отрядтары өте жақсы дамыған. Республика бойынша алдыңғы қатарда десек артық болмас. Ал жалпы алғанда волонтерлік бойынша барлық бағыттар ұлғайып бара жатыр. Енді оның сапасымен жұмыс істеу қана қалды,– деді Татьяна Миронюк.

Екі күндік семинар 15-16 қыркүйек күні жастар бастамалары орталығында 16:00-де ұйымдастырылатын болады. Алғашқы күні арнайы сарапшылар мемлекеттік органдармен жұмыс жасаса, екінші күні нақты волонтерлік ұйымдармен, еріктілер жасақтарымен кездесіп, олардың пікірлерін, ұсыныстарын тыңдап, қабылдайды.