Облыстық мәнерлеп сырғанау федерациясының ұйымдастыруымен спортшылар шеберлік сабағын өткізіп, балалар мен жасөспірімдерге арналған эстафеталық ойындар ұйымдастырды, деп хабарлайды @Pavlodarnews.kz тілшісі.

Қалалық мәдениет, тілдерді дамыту, дене шынықтыру және спорт бөлімінің мәліметінше, шеберлік сабағы өткен демалыста Мұхтар Әуезов көшесі, 21 мекенжайындағы хоккей кортында өтті. Облыстық мәнерлеп сырғанау федерациясы қоғамдық балалар-жасөспірімдер бірлестігінің вице-президенті Жанна Ибрашева іс-шараны басшылыққа алды.

– Балалар мен жасөспірімдердің алдында өз шеберліктерін Х қысқы гимназиаданың қола жүлдегері, республикалық және облыстық жарыстардың бірнеше дүркін жүлдегері Алана Ибрашева, 2024 жылы республикалық «Spring Ice» жарыстарының күміс жүлдегері, облыстық жарыстардың бірнеше дүркін жеңімпазы әрі жүлдегері Александра Аверьянова, сондай-ақ спорт шеберіне кандидат, облыстық жарыстардың бірнеше дүркін жүлдегері Мария Глушко көрсетті, – деді ұйымдастырушылар.

Эстафета қорытындысы бойынша ұйымдастырушылар талантты балаларға тосынсый жасап, коньки мен тәтті сыйлықтар табыстады.