Қазақстанда жеңілдетілген техника лизингін дамыту және өсімдік шаруашылығын қолдау жұмыстары жалғасуда, деп хабарлайды @Pavlodarnews.kz тілшісі.

Бүгінде ауыл шаруашылығы техника паркін жаңартуға, фермерлерді қолжетімді қаржыландырумен қамтамасыз етуге және өсімдік шаруашылығының перспективалы бағыттарын дамытуға ерекше назар аударылып отыр. Сонымен қатар, мемлекет ауыл шаруашылығы өндірушілерін қолдау құралдарын кеңейтіп, оларға нарық жағдайында жұмысын сенімді түрде жоспарлауға мүмкіндік беруде.

Қолдау тетіктерінің ішінде сұранысқа ие бағыттардың бірі – ауыл шаруашылығы техникасын жаңарту. Ел бойынша, соның ішінде Павлодар облысында да машина-трактор паркінің тозу мәселесі өзекті болып отыр. Ауыл шаруашылығы өндірушілері заманауи техниканың қымбаттығына және делдалдар үстемақысы салдарынан бағаның өсуіне бірнеше рет назар аударған.

Осыған байланысты «Қазақстанда жасалған» бағдарламасы аясында отандық өндіріс пен құрастырудағы ауыл шаруашылығы техникасы мен көлік құралдарына жеңілдетілген лизинг бойынша өтінімдерді қабылдау басталды. Бұл бастама аграрийлерді қолжетімді шарттармен заманауи техникамен қамтамасыз етуге және отандық машина жасау саласын қолдауға бағытталған.

Бағдарлама шарттарына сәйкес, ауыл шаруашылығы тауар өндірушілері қазақстандық өндірістегі өздігінен жүретін ауыл шаруашылығы техникасын 10 жылға дейінгі мерзімге қаржылық лизинг арқылы сатып ала алады. Қаржыландыру мөлшерлемесі жылына 6%, ал бастапқы жарна – сатып алынатын техниканың құнының 15%-ды құрайды.

Бағдарламаны іске асыру шаруашылықтардың техникалық жаңаруын жеделдетіп қана қоймай, еңбек өнімділігін арттыруға, егіс жұмыстарын жүргізу шығындарын азайтуға және отандық ауыл шаруашылығы техникасы өндірушілерінің позициясын нығайтуға мүмкіндік береді деп күтілуде.

Техникалық паркті жаңартумен қатар мемлекет форвардтық сатып алу тетігі арқылы аграрийлерді қолдауды жалғастырып отыр. Бұл бағдарлама бірнеше жылдан бері көктемгі егіс жұмыстарын қаржыландырудың маңызды құралдарының бірі болып келеді.

Азық-түлік корпорациясының мәліметінше, мамыр айының соңына қарай ауыл шаруашылығы өндірушілеріне 29,5 млрд теңге төленген. Өткен жылдың сәйкес кезеңімен салыстырғанда қаржыландыру көлемі 11,6 млрд теңгеге артқан.

Аграрийлер егіс науқанына уақытылы дайындалуы үшін қаржыландыруға өтінім қабылдау өткен жылдың желтоқсан айында басталған. Нәтижесінде күзде 478 мың тонна дәнді және майлы дақылдарды жеткізуге келісімшарттар жасалған.

Дәстүрлі түрде негізгі үлесті бидай құрайды – 334,3 мың тонна. Сонымен қатар мамандар майлы дақылдарға деген қызығушылықтың айтарлықтай артқанын атап өтеді. Егін жинаудан кейін фермерлер Азық-түлік корпорациясы ресурстарына шамамен 95 мың тонна күнбағыс, рапс және зығыр тұқымын жеткізуді жоспарлап отыр. Бұл көрсеткіш өткен ауыл шаруашылығы маусымымен салыстырғанда 2,5 есе жоғары.

«ҚТЖ «Азық-түлік корпорациясы» ҰК» АҚ басқарма төрағасы Асылхан Джувашевтің айтуынша, майлы дақылдар егіс алқаптарының ұлғаюы бірнеше факторға байланысты. Біріншіден, бұл өнімнің дәстүрлі бидайға қарағанда нарықтық бағасының жоғары болуы. Сонымен қатар майлы дақылдарға ішкі қайта өңдеу кәсіпорындары тарапынан да, шетелдік сатып алушылар тарапынан да тұрақты сұраныс бар.

Бұл бағыттың дамуына қосымша серпін беретін фактор – ел ішінде жаңа қайта өңдеу қуаттарының іске қосылуы. Өңдеу саласы дамыған сайын шикізатқа сұраныс арта түседі, бұл аграрийлерге өндірісті әртараптандыруға және табыстылықты арттыруға қосымша мүмкіндік береді.

Осылайша, жеңілдетілген қаржыландыру, техника жаңарту бағдарламалары және өсімдік шаруашылығы өнімдеріне сұраныстың артуы ауыл шаруашылығы саласының одан әрі дамуына және елдің азық-түлік қауіпсіздігін нығайтуға қолайлы жағдай жасап отыр.