Ауыл тұрғындары көптен бері сұрап жатқан жобалар іске асуда, деп хабарлайды @Pavlodarnews.kz.

Павлодар қаласына қарасты Жетекші ауылында Жол картасы аясындағы жобалардың жүзеге асырылуына байланысты шығу мониторингі өтті. Жұмысшы топ құрамында «AMANAT» партиясы мен облыстық қоғамдық кеңестің өкілдері болды.

Инспекция барысында ерекше назар су құбыры құрылысына аударылды. Бұл – ұзақ жылдар бойы ауыл тұрғындарын толғандырған маңызды мәселе, сондықтан нысан партияның ерекше бақылауында. Бүгінгі күні құрылыс толық аяқталып, ұзындығы 17 шақырым болатын су құбыры тартылды. Қазіргі уақытта нысанды пайдалануға беру актісін тіркеуге қажетті құжаттар әзірленіп жатыр.

Мониторинг аясында комиссия мүшелері жақында ғана асфальтталған жолдардың сапасын да тексерді. Жөндеу жұмыстары толық аяқталған, жалпы ұзындығы 3,8 шақырымды құрайды. Жол жабыны техникалық талаптарға сәйкес келеді.

Бағдарлама соңында комиссия мүшелері мәдениет үйінің құрылыс алаңына барды. Әлеуметтік маңызы бар бұл нысан белгіленген кесте бойынша салынуда, құрылыс қарқынды жүріп жатыр. Нысанды 2025 жылдың қыркүйек айында пайдалануға беру жоспарланған.

Сапар барысында «AMANAT» партиясының өкілдері ауылдық елді мекендердегі инфрақұрылымдық жобалардың сапасы мен уақытылы орындалуын жүйелі және ашық бақылаудың маңыздылығын атап өтті.