Ертіс ауданының жастары ерекше атмосфераны алғашқылардың бірі болып қалыптастырды, деп хабарлайды @Pavlodarnews.kz тілшісі.

Өңірде жастардың кешкі уақытын мазмұнды әрі қызықты өткізуге бағытталған «Ертіс толқыны» жобасы басталды. Шаралар кешені бейресми, достық қарым-қатынас қалыптастыруға және жастардың мәдени белсенділігін арттыруға бағытталған.

Аудандық Жастар бастамаларын дамыту орталығының директоры Мәдина Кеңесова облыстық жобаны іске қосу бастапқыда қорқынышты көрінгенін жасырмайды.

–  Алғашында сәл қобалжу болды. Бірақ, біз әлеуметтік сауалнама жүргізіп, нәтижесіне сүйене отырып сценарий жасадық. Әркім өзіне ұнайтын іс табуы үшін гипс құю, моншақ өру, музыка, караоке және TikTok баттл сияқты арт-алаңдар ұйымдастырдық. Ашық аспан астында отандық фильмдер көрсетілуде. Мысалы, «Бизнес по-казахски» және «Закладка». Шеберлік сағаттарында жасалған бұйымдарды жастар өзімен бірге естелік ретінде алып кете алады, – дейді Мадина.

Шараларға 50-ден астам жас жұмылдырылған. Олардың қатарында мұғалімдер, суретшілер, мүсіншілер, музыканттар, спортшылар және «Дипломмен – ауылға» бағдарламасының қатысушылары бар.

Ақтөбе қаласындағы «Тарлан» колледжін театр және кино актері мамандығы бойынша тәмамдаған Олжас Иванов Ертіс ауданына мемлекеттік бағдарлама бойынша келді. Мұнда ол отбасын құрып, көтермеақы, тұрақты жұмыс және баспанамен қамтамасыз етілген. Қазір жергілікті мәдениет үйінде еңбек етеді.

–  Бірнеше жыл ішінде шешендік және сахналық өнер үйірмесін аштым. Қойылымдар қоймасақ та, балалар сахнада өзін еркін ұстауды, көркем оқуды үйренді. Мұндағы халық өте мейірімді. Тегім ерекше болғанымен, орыс тілін бұрын нашар білетінмін, бірақ осында жетілдіріп алдым, – дейді Олжас.

«Шеберлер қаласы» өнер аймағы ерекше қызығушылық тудырды. Көпшілікті Зинаида Гребенникова жинады. Ол Ертіс ауданындағы Балалар шығармашылығы және бос уақытын қамту орталығында он жылдан астам уақыт жұмыс істейді. Бұрын тұзды қамырмен жұмыс істеген, соңғы жылдары гипспен айналыса бастаған.

–  Бір жыл бұрын жол апатына түсіп, гипспен жаттым. Сол кезде гипспен шығармашылықпен айналысу идеясы келді. Қазір гипс құю бойынша шеберлік сабақтарын өткіземін. Материалды қалай араластыру, кептіру, акрилмен бояу керектігін көрсетемін. Біз ағартқыш пен қоюлатқыш қосылған кәсіби гипсті қолданамыз. Қою масса бірден қалыптарға құйылады. Бір кештің өзінде ондаған бұйым жасауға болады. Мысалы, араларды жеке құйып, жалпы композицияға қосамыз. Таңқурай, жапырақ, пион сияқты түрлі қалыптар бар, – дейді Зинаида.

Қазір Зинаида ауданның 25 мектебінде шеберлік сабақтарын өткізеді. Оның үйірмесіне 50-ге жуық бала қатысады. Креативті оқушылар тойбастарға арналған гипс бұйымдарын жасап, сата бастады.

Ақбота Әмірбек үшін бастауыш сынып мұғалімі болу – алғашқы еңбек тәжірибесі. Б.Ахметов атындағы жоғары педагогикалық колледжді тәмамдап, туған ауылына оралған.

–  Бастауыш сынып мұғалімі бәріне қабілетті болуы керек: балаларға дос болу, тіпті, моншақ өру бойынша шеберлік сабағын өткізу. Балаларды қызықтыру үшін бәрін үйреніп аласың. Моншақпен жұмыс істеуді интернеттен үйрендім. Идея көп. Жоба аясында білезік пен сақина тоқу бойынша шеберлік сабақтарын өткіземін, ал кішкентайлар үшін түрлі-түсті қағаздан аппликациялар дайындадық, – дейді Ақбота.

Ең белсенді жастар үшін TikTok және караоке баттлға арналған арнайы арт-аймақтар дайындалды. Бұл идеяның бастамашысы – аудандық Жастар бастамаларын дамыту орталығының инспекторы Айжан Зайнитденова. Ол TikTok-та белсенді және караокеде ән айтуды жақсы көреді.

–  TikTok –  өте танымал платформа. Көптеген жас тиктокерлер бар. Біз мұндай форматты алғаш рет қолданып отырмыз. Жарықпен жабдықталған аймақта трендтерді түсіруге, тікелей эфир жүргізуге, билеуге және салауатты өмір салтын насихаттауға болады. Караоке баттл жастардың ашылуына көмектеседі. Мүмкін, арамызда жұлдыздар жүрген шығар? Кейбіреулер ән айтуға ұялады, бірақ мұнда кез келген жанрда ән айтуға болады, –  дейді Айжан. 

«Ертіс толқыны» жобасы жаз бойы аудан тұрғындарын қуантуды жалғастырады. Инициаторлардың айтуынша, жоба бес бағытты қамтиды: «Жастар vibes» –  шығармашыл жастарға, «Таза дем» – спорт сүйер қауымға, «Не әңгіме?» – пікірталас алаңы, «Ашық әлем» – Қазақстан халықтарының мәдениетімен таныстыру, «PRO өнер» – сахналық өнер мен шешендікке қызығушылығы бар павлодарлықтарға арналған.