Достықта шекара жоқ. Адамдар ғана емес, шаһарлар да бауырлас бола алады, деп хабарлайды @Pavlodarnews.kz тілшісі.

Ресми мәліметтерге сүйенсек, Павлодар облысындағы бас қаланың бауырлас бес қаласы бар: Кайсери (Түркия), Быдгощь (Польша), Омбы және Новосібір (Ресей), сонымен қатар Бургас (Болгария). 

Бұл «отбасының” үлкені – Омбы. 2007 жылы Ертіс жағасындағы қос қаланың әкімдіктері сауда-экономикалық, мәдени, ғылыми және білім салаларын қамтитын ынтымақтастық туралы келісімге қол қойған.

Үш жылдан соң Павлодар облысы делегациясының Жерорта теңізі аймағына сапары кезінде Түркияның Кайсери қаласымен бауырластық келісімге қол қойылды. Орталық Анатолиядағы Кайсери қаласының әкімдігі индустриалды-инновациялық ынтымақтастыққа ерекше қызығушылық танытты.

Екі жылдан кейін Павлодар Польшадағы Быдгощь қаласымен бауырластық қарым-қатынас орнатты. Бұл қалалар достық байланыстарды қолдап, мәдениет, білім, экономика және туризм салаларында тәжірибе алмасып, ынтымақтастық жасайтынын білдіреді.

2021 жылдың тамыз айында Новосібірмен бауырластық туралы келісімге қол қойылды. Содан бері экономика, мәдениет, білім беру, сондай-ақ жастар мен спорттық алмасулар саласында белсенді ынтымақтастық жүзеге асырылып келеді.

2022 жылдың 22 қыркүйегінде Болгарияның Бургас қаласымен бауырластық мәртебесі ресми түрде бекітілді.

Бұл келісім – экономика, мәдениет, білім беру және туризм салаларындағы серіктестікті дамытуға бағытталған. Қазіргі уақытта қалалар арасында тікелей чартерлік рейстерді іске қосу мүмкіндігі де талқылануда.

Саясаттанушылардың пікірінше, бауырластық – қағаз түріндегі әдемі сөздер емес, бұл – қалалардың бір-бірінен тәжірибе алмасуға және бірлесе дамуға деген ұмтылысын көрсететін нақты құрал.

Әлеуметтік ғылымдар магистрі, саясаттанушы Борис Поломарчуктың айтуынша, Павлодар үшін бұл – мәдени, экономикалық және технологиялық дипломатияның стратегиялық тетігі.

– Олардың әрқайсысы – экономикалық, туристік немесе технологиялық кластер ретінде ерекшеленеді. Мысалы, Новосібір ғылыми және инновациялық алмасу тұрғысынан қызықты. Бауырластық Павлодарға жаңа идеялар, жобалар, инвестициялар және жастар бастамаларына жол ашып, түрлі салаларда үздік тәжірибе алмасуға мүмкіндік береді, – дейді саясаттанушы.

«Бауырластық» сөзі дипломатиялық мазмұнда сенім мен серіктестікке ашықтықты білдіреді. Қалалар бірлесе жұмыс істегенде, олар оқуға, келісуге және өркендеуге қабілетті аймақтар ретінде бедел жинайды. Аймақтық деңгейде мұндай байланыстар ішкі дамуға серпін береді.

Сарапшының айтуынша, бұл Павлодардың «жұмсақ күшін» қалыптастырады.

– Қала бизнеске тартымды мекенге айналады, гранттар алады, мәдени форумдар ұйымдастырады, инвестиция тартады және бірлескен жобаларға қатысады. Географиялық жақындық, ортақ сын-қатерлер мен мүмкіндіктер ынтымақтастық үшін берік негіз қалыптастырады. Павлодар мен Қайсериді – дамыған өнеркәсіп, Бургаспен – логистика мен туризм, ал Быдгощь, Омбы және Новосібірмен – академиялық және ғылыми байланыстар біріктіреді, – дейді Борис Поломарчук.

Сарапшы, сондай-ақ қазіргі өзекті және болашақта маңызды бағыттарды атап өтті – қалалық шаруашылықты басқарудан бастап цифрлық трансформацияға дейін.

– Қазіргі әлемде қалалар жаһандық ойыншыларға айналуда, ал бауырластық – халықаралық диалогқа қосылудың мүмкіндігі. Экономика мен технология түйіскен жерде өзара тиімді жобалар туындауы мүмкін. Индустриялық орталық ретінде Павлодар озық тәжірибелерді – «жасыл» басқарудан цифрландыруға дейін игеруге мүдделі. Бұл қалдықтарды өңдеу, экологиялық урбанистика, цифрлық мемлекеттік қызметтер мен адами капиталға инвестицияларды қамтиды. Қалада алдыңғы қатарлы жоғары оқу орындары жұмыс істейді, бұл білім беру мен ғылыми алмасуға негіз қалайды, – деп атап өтті саясаттанушы.

Бауырластық – жай ғана достық емес. Бұл – ресмиліктен тыс, Павлодардың Қазақстан мен Орталық Азиядағы логистика, өнеркәсіп және инновация орталығы ретіндегі рөлін нығайта алатын стратегиялық байланыс желісі. Қалада кадрлар, энергетикалық әлеует және стартап бағдарламаларға, форумдарға, халықаралық бастамаларға арналған алаңға айналу мүмкіндігі бар. Мәселен, Новосібірдегі Академқалашық – ғылыми байланыстардың бірлескен дамуға негіз бола алатынының жарқын мысалы.