Облыстық білім беру басқармасы интернаттық ұйымдар бөлімінің бас маманы Гүлжан Жүнісованың айтуынша, биылғы жылы 12-рет ұйымдастырылып отырған шара барысында көркем-қолданбалы және бейнелеу өнері номинациялары бойынша көрме ұсынылған. Ереже бойынша жеткіншектер 10-14 және 15-18 жас аралығында екі топқа бөлінді.

- Қазылар алқасы құрамында жобаның басшылары мен ұйымдастырушылары, қазақстандық эстрада жұлдызы Алмас Кішкенбаев, облыстық қосымша білім беру ұйымдарының өкілдері жұмыс істеді, - дейді Гүлжан Жүнісова. - Олар жас таланттардың өнерлерін алты номинация бойынша бағалады: аспапта орындау, әнді ым-ишаратпен орындау, вокалдық орындау, хореография, көркем-қолданбалы және бейнелеу өнері. Екінші республикалық іріктеу кезеңіне өткен қатысушылар еліміздің басты сахнасында өнер көрсетіп, экскурсиялар мен көрмелерге, отандық жұлдыздармен кездесуге қатыса алады. Айта кетерлік жайт, биылғы жылы қатысушылардың саны артқан. Өткен жылы облыс бойынша 200 бала келген болатын. Фестивальдің қорытындысы 5-мамырда белгілі болады.

Еске сала кетейік, былтыр гала-концертке жолдама алған есту қабілеті бұзылған балаларға арналған № 1 мектеп-инернатының балалары корей биімен арнайы номинацияға ие болса, домбырамен күй орындаған Ақсу қаласына қарасты Үштерек ауылы орта мектебінің 8-сынып оқушысы Иса Өмірзақұлы үшінші орынды жеңіп алған.

Ақбота Сейсенбаева

pavlodarnews.kz