Аққулыда «велошабандоз» медбике науқастарға жедел жетеді

Павлодарда үйінен бір апта бұрын шығып кеткен келіншек табылмай жатыр

Павлодарлық театр әртістері ауылдықтарға жан ләззатын сыйлады

Ақпан айында Павлодар облыстық қазақ музыка-драма театрында қандай қойылымдар болады

Екібастұздық машинист әп-сәтте жұлдыз атанды (ВИДЕО)

Биыл Павлодарда онға жуық трамвай өткелдеріне жөндеу жұмыстары жүргізіледі

Биыл Павлодар облысына қоныс аударушыларға арналған квота саны артқан

Павлодар облысында алимент төлеушілерге арналған бос жұмыс орындары жәрмеңкесі өтеді

Саяхатшының көзімен: Павлодарда жас суретші Әділжан Мұсаның көрмесі өтеді

16.11.2022

Аққулыда «велошабандоз» медбике науқастарға жедел жетеді

Алпысты алқымдаған ақ желеңді Гүлназ Құспекова қысы-жазы велосипедіне отырып, қоңырау түскен мекенжайға жетіп, тұрғындарға алғашқы көмек көрсетіп келеді, деп хабарлайды @Pavlodarnews.kz.

Гүлназ Құспекова 1983 жылдан бастап ақ халатын бір сәтке де тастамай, абыроймен еңбек етіп келеді. Екібастұз қаласындағы медицина колледжін тәмамдаған ол, еңбек жолын осы өңірден бастаған.

- Бұл шаhарда жұмыс істеп жүріп, Аққулы ауданына қарасты Тақыр ауылына тұрмысқа шықтым. Міне, осы сәттен бастап аталған ауылда жұмыс істеймін. Шамамен 10 жыл Екібастұз қаласында, ал қазіргі кезде тақырлықтарға медициналық көмек көрсетіп келемін. Негізі, бала күнімнен дәрігер болуды армандадым. Сыныптастарымның барлығы ақ желеңділерден қашып жүрсе, мен керісінше, олардың құралдарына ерекше қызығушылықпен қарайтын едім. Іштей өзіме «дәрігер боламын» деп уәде бердім. Күні бүгінге дейін артылған міндетті орындап, сауатты әрі сапалы ем жасауға тырысып жүрмін. Келесі жылы бұл салада жүргеніме 40 жыл толады, - дейді Гүлназ Құспекова.

Оның айтуынша, тұрғындардың қоңырауына байланысты ауылдың бір шетінен арғы басына шұғыл жету қажет болады. Сол себепті, жолдасы сыйлаған велосипед оның жедел жәрдем көлігіне айналған.

- Сырт қарағанда көпшілік көзге медбикенің жұмысы қиын болып көрінбеуі мүмкін. Алайда, біз науқастың денсаулығына дәрігер сияқты жауаптымыз. Тақырда тек медициналық пункт болғандықтан, мұндағы дәрігер де, медбике де – мен. Тиісінше, алғашқы көмекті көрсетіп, бірнеше адамға уақытылы ем жасау керек болады. Себебі, үй жағдайында босанып қалу, инфаркт алу, қан қысымының көтерілуі кезінде велосипедпен шұғыл жетуге тырысамын. Атап өтер болсам, бұл көлігіммен ауыл аралап жүргеніме 5 жыл болыпты. Тіпті, «велошабандоз» медбике аталып кеттім, - дейді ол.

Түнгі уақытта жедел жәрдем қызметіне қоңырау саны артатыны белгілі. Ал бір қолына қобдиша мен шамды ұстап, велосипед жүргізу медбике Гүлназға үйреншікті жағдайға айналған.

- Медбикенің бойында қорқыныш болмауы тиіс. Дәрігерлер келген сәтке дейін сескену, сенімсіздік сынды ойларды ысырып тастап, алғашқы көмекті дұрыс көрсете білудің маңызы үлкен. Әрбір медициналық көмек кітабы медбикенің жадында сақталғаны да жөн. Мысалы, өз басым науқасқа жеткенше ем-шараны қалай жасаймын, қандай дәрі беру қажет екенін електен өткіземін. Мұның көмегі бар. Себебі, бір ғана қате қадамнан адам өмірі күрт өзгеруі ықтимал. Тіпті, инфарктің бірінші белгілері арқылы дер кезінде ем жасалмаса науқас арбаға таңылуы мүмкін. Ал медицина мұндай олқылықты кешірмейді, - деп атап өтті Гүлназ Балтабайқызы.

Алпысты алқымдаған медбике салауатты өмір салтына сай спортпен қатар дұрыс тамақтану режимін қалыпты ұстайды. Күнделікті таңғы бағдарламамен бірге жаттығу жасайды.

- Осыдан 26 жыл бұрын, қыс мезгілі болатын. Әдеттегідей дала боран, көлік жоқ. Үй жағдайында бала туған екен, ем-шара жасау керек болды. Қолымды медициналық спиртпен бірнеше мәрте тазалап, тиісті әрекетті жасадым. Егер де, жедел жәрдемді күтер болсам, жағдайдың соңы жақсылықпен аяқталмас еді. Сондықтан медицинада тәуекелшіл бола да білу керек деп санаймын. Қазір сол аман-есен дүниеге келген азамат 26 жасқа толды. Үнемі алғысын жаудырады. Осындай сәттерден соң мамандығыма деген махаббат артады, - деді Гүлназ Құспекова.

Өз ісінің маманы, ортасына құрметті Гүлназ Балтабайқызы бейнетінің зейнетін көруіне аз уақыт қалды. 3 баланың анасы аяқ-қолымнан әл
кеткенше «медбике Гүлназ» қызметін жалғастырамын дейді. Себебі, оны емделушілер күтеді. Бұл саладан ол өмірдегі орнын тапты.

Махаббат Төлебай

Количество показов: 245

Возврат к списку

Pavlodarnews.kz АА материалдарын қолдану ережелері