Ертіс өңірінің жұртшылығына театр ұжымы жаңа бағдарлама ұсынды. Театр әртісі Сырымбет Бибосынов кеш туралы және алдағы жоспарлары туралы айтып берді.

- Бұл жолы елімізде белең алып жатқан парақорлық жайлы кеш береміз, - деді Сырымбет Бибосынов. – Халыққа да, үкіметке де тиіспей, парақорлық жайлы ой тастап, оның өмірде де, шариғатта да дұрыс емес екендігін әзілмен келтірген қойылымдар болмақ. Бұл «Алма – ата» концертіміздің соңы Алматыда болады. Павлодарға үшінші жыл келіп жатырмыз. Біз басында солтүстік өңірлерден қорқатынбыз. Адамдар келмей қала ма деп қауіптенетінбіз. Қазір халық үйренді. Концертімізге келетін адам саны да жыл сайын артуда. Өйткені, біздің концерт – әкесі мен анасын, әйелін, баласын ертіп, бірге келіп көретін концерт. Біз ешкімнің абыройына нұқсан келтірмейміз, ананы-мынаны жамандайтын артық дүние жоқ.

Театр әртісі жылда 4 концерт беретін «Өнер қырандарының» биыл 3 концертпен тоқтағанын атап өтті. Сондай-ақ келер жылы кино түсіретіндіктерін айтты.

- Келер жылы «Берекелі мереке 6» концертімізбен бастаймыз, - деді Сырымбет Бибосынов. – Сосын өзіміздің кино түсіруді жоспарлап отырмыз. Жалпы, біз жылда 4 концерт беруші едік, биыл 3 концертпен тоқтадық. Өйткені, шаршадық. Ылғи сапардамыз. Ми да тоқтайды екен. Қашанғы юмор шығара бересің?! Біздің театр – құйрықтан теуіп, белден төмен әңгіме айтатын театр емес. Ананы-мынаны шығара бермейміз. Келер жылы кино түсірсек, уақыт көп кетеді. 2 концертке қысқаруы мүмкін. Халыққа дұрыс нарсе шығару үшін оған дұрыс дайындық керек.

Айта кетейік, басты рөлдерде театр актерлары ойнайтын фильм «тарихи комедия» болмақ.

Оразбек Саяхат
Фото: Ғабит Хафиз

pavlodarnews.kz

Тэги: Павлодар, Өнер қырандары, театр, әзіл, кеш