Екібастұз қалалық емханасы басшысының медициналық қызмет сапасын бақылау бойынша орынбасары Светлана Подзорованың хабарлауынша, 11-наурыздан 12-наурызға қараған түні ауруханаға ғажап жағдайда аман қалған қыз жеткізілген.

- Тәжірибеме сүйенсем, биіктіктен құлағандардың тірі қалу пайызы өте төмен, - деді Светлана Подзорова. – Бойжеткен жерге сәтті түскен. Терезенің астында соққыны жұмсартқан қар жатқан болуы мүмкін. Ол аяғымен түскен, басымен немесе арқасымен құласа тірі қалуы екіталай еді. Қазір ауыр жарақатпен жансақтау бөлімінде тұрақты терапия қабылдауда. Әзірге нақты болжам жоқ.

Белгілі болғандай, 21 жастағы қыз мас күйде болған. Алдын ала болжам бойынша ол терезеге шынтақтап сүйеніп тұрып, тайып кеткен.

Дәрігерлер қойған диагноздың арасында күрделі ашық көпжарықшақтанған сынықтар, асық жіліктің жабық сынығы, үшінші бел омыртқасының неврологиялық бұзылусыз сынығы, зақымданудан есеңгіреу, мас болу, өкпенің зақымдануы бар.

Мереке күндері биіктіктен Екібастұздық тағы бір тұрғын – 34 жастағы әйел құлаған.

- Ол ауруханаға 9-наурызда түсті, - деді Светлана Подзорова. – Алайда, бір тәулік өтпей емханада көз жұмды. Себебі, бас миының ауыр жарақаты мен көптеген сынықтар алып, ішкі құрылысы ажырап кеткен.

Дулат Райымбек

pavlodarnews.kz

Тэги: Қоғам, денсаулық