Кештің басында қатысушылар қызыл кілемнің үстімен жүріп өтті. Бұдан кейін мерекелік концертте талантты әншілер мен домбырашылар, бишілер өз өнерлерін көрсетті.

Кинофестивальді Павлодар облысы әкімінің орынбасары Мейрам Бегентаев құттықтау сөзімен ашты.

- Айтулы шараның Ертіс өңірінде өтіп жатқаны бекер емес, - деді Мейрам Бегентаев. – Бұл жерде белгілі актер және режиссер Шәкен Айманов дүниеге келген. Былтыр Софияда өткен кинофестивальде үлкен жетістікке жеттік. Людмила Лебедеваның «Мангашлык» фильмі бас жүлдені жеңіп алған. Бірінші жұмысты шағын айпад арқылы көрсеттік. Соның өзінде қатты әсер етті. Бұдан кейін режиссердің командасына мүдделестері қосылып, кинофестивальді өткізу туралы идеяларымен бөліскен. Осындай ұсыныспен Павлодар облысының әкімі Болат Бақауовқа жүгінген. Аймақ басшысының қолдауымен және танымал режиссер Асанәлі Әшімов, Ерлан Нұрмұхамбетов пен депутаттардың көмегінің арқасында Павлодарда үлкен кинофестиваль өтіп жатыр.

«Мангашлык» туындысы үшін Еrtis Cinema фестивалінің алғашқы мүсіні Людмила Лебедеваға табыс етілді. Оның бұл фильмі шараны ашты.

- 19 минуттық фильм үшін бүкіл қаланы жұмылдыруға тура келді, - деді Людмила Лебедева. – Залда түсірілімге көмектескен адамдар отыр. Олардың арқасында осындай картина пайда болды. Сол үшін үлкен алғыс.

Мейрам Бегентаев болашақта фильмдерді Ертістің жағасында Ertis Promenade сахнасында көруге болатынын атап өтті.

- Мұндай фестивальдің Павлодарда өтіп жатқаны керемет, - деді қазылар алқасының төрағасы, ҚР кинематографистер Одағының төрағасы Ермек Тұрсынов. – Сіздер басқа облыстар үшін үлгі боласыздар. Мұндай шараларды мегаполистерде ғана өткізу керек. Көрермендердің барлығын жақсы киноға үйрету керек. Ең бастысы, Еrtis Cinema фестивалін дәстүрге айналдырған жөн. Келесі бірнеше күн бойы Павлодардың киноалаңдарында қысқа метражды фильмдер көрсетіледі.

Томирис Бекжан

pavlodarnews.kz

Тэги: Павлодаор, кинофестиваль, мәдениет, Рухани